وزیر اعظم کے خصوصی معاون ہارون اختر خان کی پاکستان بزنس کونسل کے وفد سے وزارت صنعت و پیداوار میں اہم ملاقات ہوئی۔ اجلاس کی صدارت ہارون اختر خان اور وفاقی وزیر تجارت جام کمال خان نے کی جس میں برآمدات، درآمدات اور ٹیرف سے متعلق اہم مسائل پر تبادلہ خیال کیا گیا۔ہارون اختر خان نے اجلاس کے دوران اس بات کو تسلیم کیا کہ پیداواری لاگت اور ٹیرف چیلنجز بزنس کمیونٹی کے لیے ایک اہم مسئلہ ہیں۔ انہوں نے یقین دلایا کہ وزیر اعظم شہباز شریف برآمدات کے فروغ اور کاروباری ماحول کو بہتر بنانے کے لیے بھرپور کوشش کر رہے ہیں۔انہوں نے مزید کہا کہ معاشی ترقی کے لیے پالیسی کا تسلسل انتہائی ضروری ہے اور حکومت صنعتوں کے تحفظ اور ترقی کے لیے ہر ممکن اقدامات کرے گی۔ انہوں نے پاکستان بزنس کونسل کے وفد سے خطاب کرتے ہوئے کہا کہ اگر آپ ترقی کر رہے ہیں تو ہم ترقی کر رہے ہیں۔ وزیر تجارت جام کمال خان نے بھی ملکی اور بین الاقوامی سطح پر تجارت اور صنعت کے فروغ کی اہمیت پر زور دیا۔ انہوں نے کہا کہ حکومت کاروباری طبقے کو ہرممکن سہولیات فراہم کرنے کے لیے عملی اقدامات کر رہی ہے تاکہ پاکستان کی تجارتی مسابقت کو بڑھایا جا سکے اور طویل مدتی اقتصادی استحکام حاصل کیا جا سکے۔ انہوں نے کہا کہ حکومت نے اس عزم کا اعادہ کیا ہے کہ پاکستان کی صنعتی و تجارتی ترقی کے لیے بزنس کمیونٹی کے ساتھ مشاورت کا سلسلہ جاری رکھا جائے گا۔
22
