اسلام آباد ( کا مرس رپورتڑ ) 21 اپریل 2025:
پاکستان اور افریقی ممالک کے درمیان بڑھتے ہوئے تعلقات کے تحت روانڈا کے وزیر برائے خارجہ امور و بین الاقوامی تعاون، ایمبیسیڈر اولیویئر جے پی ندُوہُنگیریہے (Ambassador Olivier J.P. Nduhungirehe) نے وفاقی وزیر برائے تجارت، جام کمال خان سے اسلام آباد میں ملاقات کی۔ ملاقات کا مقصد تجارت، سرمایہ کاری، سیاحت اور صنعتی ترقی کے شعبوں میں دوطرفہ تعاون کو فروغ دینا تھا۔ یہ ملاقات روانڈا کے وزیر خارجہ کے پاکستان کے سرکاری دورے (21 تا 22 اپریل 2025) کے دوران ہوئی۔
یہ ملاقات خوشگوار اور تعمیری ماحول میں ہوئی، جس میں پاکستان کی افریقی منڈیوں میں دلچسپی اور بامعنی اقتصادی شراکت داری قائم کرنے کے عزم کو اجاگر کیا گیا۔ وزیر تجارت جام کمال خان نے پاکستان کی روانڈا کے ساتھ تعلقات کو مضبوط بنانے کے عزم کا اعادہ کیا اور زراعت، خدمات، آٹو مینوفیکچرنگ (خصوصاً موٹر بائیکس اور زرعی مشینری)، سیاحت، کھیل اور تعلیم جیسے کلیدی شعبوں میں تعاون کی وسیع گنجائش کو نمایاں کیا۔ وفاقی وزیر نے روانڈا کے وزیر خارجہ کو پاکستان کی سیاحت پر مبنی ایک تعارفی کتاب بھی پیش کی اور انہیں پاکستان کے شمالی علاقوں کی قدرتی خوبصورتی دریافت کرنے کی دعوت دی۔ انہوں نے عوامی اور کاروباری سطح پر روابط کو بڑھانے کی اہمیت پر زور دیا۔ جام کمال خان نے بتایا کہ حال ہی میں لاہور میں منعقد ہونے والے ہیلتھ، انجینیئرنگ اینڈ منرل شو (HEMS) میں دنیا بھر سے 900 شرکاء شریک ہوئے، جن میں سے 268 کا تعلق افریقی ممالک سے تھا، اور ان میں نمایاں تعداد روانڈا سے آئی ہوئی تھی۔ انہوں نے اس بھرپور شرکت کو پاکستان اور افریقی ممالک کے درمیان بڑھتے ہوئے تعلقات کی مثبت علامت قرار دیا۔
ایمبیسیڈر ندُوہُنگیریہے نے افریقی ممالک کے ساتھ تعاون بڑھانے کے لیے پاکستان کی کاوشوں کو سراہا اور روانڈا کی جانب سے اقتصادی شراکت داری کو مزید وسعت دینے میں دلچسپی ظاہر کی۔ انہوں نے بتایا کہ روانڈا میں سرمایہ کاروں کے لیے مکمل سہولیات سے آراستہ اسپیشل اکنامک زونز (SEZs) موجود ہیں جو غیر ملکی سرمایہ کاری کو فروغ دیتے ہیں۔ دونوں فریقین نے دوطرفہ تعلقات میں مسلسل بہتری پر اطمینان کا اظہار کیا اور اعلیٰ سطحی روابط اور کثیرالملکی پلیٹ فارمز پر تعاون کے فروغ پر اتفاق کیا۔ انہوں نے باہمی مفادات کے نئے مواقع تلاش کرنے کے لیے قریبی تعاون جاری رکھنے کے عزم کا اعادہ کیا۔ وفاقی وزیر جام کمال خان نے اپنے اختتامی کلمات میں پاکستان اور روانڈا کے تعلقات کو دوستانہ، باہمی احترام، مشترکہ اقدار اور بین الاقوامی سطح پر ہم آہنگی پر مبنی قرار دیا اور ان تعلقات کو مزید فروغ دینے کے عزم کا اظہار کیا
3
