اسلام آباد۔13اپریل ( حبدار نیوز ):وفاقی وزیر برائے سمندرپار پاکستانیز چوہدری سالک حسین نے کنونشن میں شریک بیرون ملک مقیم پاکستانیوں کا خیر مقدم کیا اور کنونشن کوتارکین وطن کے مسائل کا حل قرار دے دیا ،چوہدری سالک حسین نے شرکا کا گرمجوشی سے خیرمقدم کیا اور ان کی شرکت پر شکریہ ادا کرتے ہوئے اس پروگرام کو بیرون ملک مقیم پاکستانیوں کے مسائل کا حل قرار دیا ہے۔ نجی ٹی وی سے گفتگو میں وفاقی وزیر نے بیرون ملک مقیم پاکستانیوں کی خدمات کو سراہتے ہوئے کہا کہ یہ پروگرام ان کی پاکستان کے لیے قابلِ ستائش خدمات کو اعتراف کرنے کا ایک بہترین موقع فراہم کرے گا۔ انہوں نے زور دے کر کہا کہ بیرون ملک مقیم پاکستانیز حکومت پاکستان اور عوام کے دل کے بہت قریب ہیں ، ان کے مسائل کے حل اور ان کی مدد کے لیے ہر ممکن اقدامات کیے جائیں گے۔ چوہدری سالک حسین نے بیرون ملک مقیم پاکستانیوں کی خدمات پر روشنی ڈالتے ہوئے کہا کہ یہ پروگرام ان افراد کی خدمات کو سراہنے کے لیے منعقد کیا گیا ہے جو بیرون ملک رہ کر پاکستان کی ترقی اور معیشت میں اہم کردار ادا کرتے ہیں۔کنونشن کی سرگرمیوں کے حوالے سے ایک سوال کے جواب میں سالک حسین نے کہا کہ این اے ڈی آر اے، ایف آئی اے، نیب، پاسپورٹ آفس، اسٹیٹ بینک اور ایف بی آر سمیت مختلف اداروں میں خصوصی کائونٹر قائم کئے گئے ہیں تاکہ بیرون ملک مقیم پاکستانیوں کو براہ راست مدد فراہم کی جا سکے۔ انہوں نے بتایا کہ کنونشن کامیابی سے جاری ہے اور شرکاء نے حکومتی کوششوں کو سراہا ہے۔ ان کا کہنا تھا کہ یہ تعاون مشترکہ مقاصد کی طرف ایک اجتماعی سوچ کی عکاسی کرتا ہے، جہاں مختلف اسٹیک ہولڈرز بغیر کسی رکاوٹ کے مل کر کام کر رہے ہیں۔ موثر تعاون، جیسا کہ اس پروگرام میں دیکھنے میں آیا، شرکاء کو خیالات، خدشات اور تجاویز کا تبادلہ کرنے، تعلقات استوار کرنے اور مشترکہ اہداف کی طرف پیشرفت کرنے کی سہولت فراہم کرتا ہے۔ انہوں نے مزید بتایا کہ حکومت نے بیرون ملک مقیم پاکستانیوں کے لیے ایک خصوصی بل پاس کیا ہے، جو اب پنجاب میں قانون کی شکل اختیار کر چکا ہے۔ اس قانون کے تحت خصوصی عدالتیں قائم کی گئی ہیں جو مقدمات کو 90 دنوں کے اندر نمٹاتی ہیں جبکہ وڈیو لنک کی سہولت بھی دی گئی ہے تاکہ انہیں عدالت میں ذاتی طور پر حاضر ہونے کی ضرورت نہ رہے۔
9
