اسلام آباد۔9فروری (اے پی پی):نائب وزیراعظم ، وفاقی وزیر خارجہ سینیٹر محمد اسحاق ڈار نے ایران کے وزیر خارجہ سید عباس عراقچی سے ٹیلی فون پر رابطہ کیا اور مشرق وسطیٰ کی صورتحال پر خصوصی توجہ مرکوز کرتے ہوئے غزہ میں فلسطینیوں کی مسلسل حالت زار پر تبادلہ خیال کیا۔ترجمان دفتر خارجہ کی جانب سے اتوار کو جاری پریس ریلیز کے مطابق غزہ کے لوگوں کو بے گھر کرنے کی تجویز پر تبصرہ کرتے ہوئے نائب وزیراعظم، وزیر خارجہ سینیٹر محمد اسحاق ڈار نے اس تجویز کو انتہائی پریشان کن اور غیر منصفانہ قرار دیتے ہوئے انہوں نے اس بات پر زور دیا کہ فلسطینی سرزمین فلسطینی عوام کی ہے اور واحد قابل عمل اور منصفانہ آپشن اقوام متحدہ کی سلامتی کونسل کی قراردادوں کے مطابق دو ریاستی حل ہے۔انہوں نے مزید کہا کہ پاکستان 1967 سے پہلے کی سرحدوں پر مبنی ایک خودمختار فلسطینی ریاست کے قیام کی حمایت جاری رکھے گا جس کا دارالحکومت القدس الشریف ہو گا۔ انہوں نےایرانی ہم منصب کو اس معاملے پر غور و خوض کے لیے وزرائے خارجہ کا غیر معمولی او آئی سی اجلاس بلانے کے لیے پاکستان کی حمایت سے بھی آگاہ کیا۔دونوں وزراء نے مستقبل میں ان پیش رفتوں پر قریبی رابطہ برقرار رکھنے پر بھی اتفاق کیا۔
17
