قومی احتساب بیورو (نیب ) کے ملازمین کی فلاح و بہبود کے لیے نیب کا اہم اقدام
قومی احتساب بیورو( نیب) اور نجی شعبے کے مختلف تعلیمی و طبی اداروں کے مابین مفاہمت کے 6 معاہدوں پر آج نیب ہیڈکوارٹراسلام آباد دستخط کئے گئے – چیئرمین نیب کے ویژن کے تحت نیب کے مختلف اداروں سے مزید باہمی معاہدے زیر تکمیل ہیں۔ جن کا مقصد باہمی تعاون سے کارکردگی اور خدمات کا معیار بہتر بنانا اور نیب کے ملازمین کے لیے سہولیات اور آسانیاں پیدا کرنا ہے۔قائم مقام چیئرمین نیب سہیل ناصر، پراسیکیوٹر جنرل اکاونٹیبلیٹی سیداحتشام قادر شاہ، ڈائریکٹر جنرل نیب ہیڈ کوارٹر فرمان اللہ ،چیئرمین نیب کے مشیر ظفر اقبال، کی موجودگی میں ڈائریکٹر نیب ہیڈ کوارٹر محمد عمران بٹ اور معروف انٹرنیشنل ہسپتال کے سی ای او ، شعیب احمد خان، علی میڈیکل سینٹر کے سی ای او ڈاکٹر بلال ارشد بٹ، قمر جہاں ڈائگنوسٹکس کے سی ای او زبیر ناصر، عامر نیر ڈینٹل کے چیف ڈینٹل سرجن ڈاکٹر عامر کیو خواجہ، ایس جے ڈینٹل اینڈ سکن کی سی ای او ڈاکٹر انعم جاوید چیمہ، ڈی واٹسن کیمسٹ کے سی ای او ظفر بختاوری کی طرف سے مفاہمت کے سمجھوتے پر دستخط کیے گئے۔ نیب کے دیگر افسران بھی اس موقع پر موجود تھے۔
قائم مقام چیئرمین نیب سہیل ناصر نے اس موقع ان تمام اداروں کے منتظمین کا شکریہ ادا کیا کہ مفاہمت کے سمجھوتے کے تحت یہ ادارے نیب ملازمین کے لیے اپنی خدمات با رعایت فراہم کریں گے۔ جس کی وجہ سے ملازمین کو تعلیمی و طبی سہولیات کے ساتھ ساتھ دیگر ضروریات زندگی کے حصول میں ریلیف حاصل ہوگا اور اس طرح ملازمین اپنے فرائض منصبی ذہنی آسودگی اور دلجمعی کے ساتھ سرانجام دیتے ہوئے ملکی ترقی میں اپنا موثر کردار ادا کر سکیں گے ۔ اس سہولت سے نیب کے ریٹائرڈ ملازمین اور انکے اہل خانہ بھی مستفید ہوں گے۔انہوں نے کہا کہ حالیہ معاہدوں کے تحت نیب ملازمین کو صحت کے شعبے میں متعلقہ ا داروں کے رعایتی پیکج سے استفادہ حاصل ہوگا اور ایسے مزید معاہدے بھی زیر غور ہیں۔
قائم مقام چیئرمین نیب سہیل ناصر نے کہا کہ چیئرمین نیب کی سربراہی میں نیب کا ادارہ بدعنوانی پر قابو پانے اور عوام الناس کو اس سلسلے میں درپیش مشکلات کے فوری ازالے کے لیے مختلف اداروں کے ساتھ مل کر کام کر رہا ہے ۔
