اسلام آباد۔9فروری (اے پی پی):نائب وزیر اعظم اور وزیر خارجہ سینیٹر محمد اسحاق ڈار نے اتوار کو مصر کے وزیر خارجہ بدر عبدالاتی سے ٹیلی فون پر بات چیت کی اور فلسطینی عوام کے لئے پاکستان کی غیر متزلزل حمایت کا اعادہ اور مصر کے ساتھ پاکستان کی مکمل یکجہتی کا اظہار کیا ہے۔ ترجمان دفتر خارجہ کی طرف سے جاری بیان کے مطابق وزیر خارجہ سینیٹر محمد اسحاق ڈار نے غزہ میں ہونے والی پیش رفت بشمول لاکھوں فلسطینی باشندوں کو متاثر کرنے والی سنگین انسانی صورتحال پر تبادلہ خیال کیا۔اسحاق ڈار نے فلسطینی عوام کے لئے پاکستان کی غیر متزلزل حمایت کا اعادہ کیا اور مصر کے ساتھ پاکستان کی مکمل یکجہتی کا بھی اظہار کیا۔ انہوں نے اس معاملے پر غور و خوض کے لئے وزرائے خارجہ کونسل کا غیر معمولی او آئی سی اجلاس بلانے کے لئے پاکستان کی حمایت کا بھی اظہار کیا۔ دونوں وزرا نے آنے والے دنوں میں ان پیشرفتوں پر قریبی رابطہ برقرار رکھنے پر اتفاق کیا۔
13
