ڈی ایس او شمس توحیدعباسی، ٹیسٹ کرکٹرنوید قریشی و دیگر نے سفید کارڈ اٹھاکر کھیلوں میں امن کو اجاگرکیا
راولپنڈی(سپورٹس رپورٹر)پاکستان میں کھیلوں کے فروغ کیلئے سرگرم فلاحی تنظیم’ یوتھ ایجوکیشن اینڈسپورٹس(YES) ویلفیئر سوسائٹی (رجسٹرڈ) ‘کے زیراہتمام کھیلوں کے عالمی دن کے موقع پر خصوصی تقریب کا انعقاد کیا گیا ، تقریب کے مہمان خصوصی ڈسٹرکٹ سپورٹس آفیسر شمس توحید عباسی نے ‘یس’ کے نائب صدر سابق ٹیسٹ کرکٹر نوید قریشی و دیگر کے ہمراہ انٹرنیشنل سپورٹس ڈے کا کیک کاٹا اور شرکاء نے سفید کارڈ اٹھا کر کھیلوں میں امن کے جذبے کو اجاگر کیا۔ تقریب میں یوتھ ایجوکیشن اینڈسپورٹس(YES) ویلفیئر سوسائٹی کے جنرل سیکرٹری نعیم بھٹی، خزانچی ملک عبدالرحمان، ڈائریکٹر ایڈمن عرفان خان، مطاہرسہیل،ملک ساجد اعوان،سویرا خان، مہوش عباسی، کھلاڑیوں اورممبران کی بری تعداد نے شرکت کی۔اس موقع پر ڈی ایس او شمس توحید عباسی نے کہاکہ23 اگست 2013 ء کو اقوام متحدہ نے ترقی اور امن کیلئے کھیلوں کا عالمی دن ہر سال 6 اپریل کو منانے کا فیصلہ کیا تھا جو 1896 ء میں ایتھنز میں پہلے جدید اولمپک گیمز کے آغاز کا دن تھا۔انہوں نے کہاکہ پنجاب حکومت نے وزیراعلیٰ مریم نوازشریف کے ویژن کے مطابق صوبے میں کھیلوں کے فروغ کیلئے کھیلتا پروگرام شروع کیاہے جس کے بڑے مثبت نتائج سامنے آرہے ہیں۔ سابق ٹیسٹ کرکٹر نوید قریشی نے کہاہے کہ اس دن کومنانے کا مقصد دنیا بھر کی طرح پاکستان میں امن کے فروغ میں کھیلوں کے اہم کردار کو اجاگر کرنا ہے، کھیل تمام ثقافتوں میں خیر سگالی، صحت مندانہ مقابلہ اور تعاون کے حصول کا ایک مثبت طریقہ ہے، کھیلوں کا عالمی دن صحت مند طرز زندگی کو فروغ دینے کی اہمیت کو بھی اجاگر کر رہا ہے۔
10
