کینیڈا میں پاکستان کے ہائی کمیشن میں یوم یکجہتی کشمیر منایا گیا۔
اوٹاوا میں پاکستانی ہائی کمیشن اور ٹورنٹو، وینکوور اور مونٹریال میں اس کے تین قونصل خانوں نے یوم یکجہتی کشمیر منایا، جس میں بھارتی غیر قانونی مقبوضہ جموں و کشمیر (آئی آئی او جے کے ) کے لوگوں کے حق خود ارادیت کی منصفانہ جدوجہد میں پاکستان کی غیر متزلزل حمایت کا اعادہ کیا گیا۔ اس موقع پر کئی پروگرامز ترتیب دیئے گئے جن میں تصویری نمائش، دستاویزی فلموں کی اسکریننگ اور میڈیا سے بات چیت کا اہتمام کیا گیا تاکہ بھارت کے غیر قانونی طور پر مقبوضہ جموں و کشمیر میں انسانی حقوق کی خلاف ورزیوں کو اجاگر کیا جا سکے اور غیر قانونی بھارتی قبضے کے تحت بدترین قسم کے جبر کا سامنا کرنے والے کشمیریوں سے اظہار یکجہتی کیا جا سکے۔
ہائی کمیشن میں ایک خصوصی تقریب منعقد کی گئی جس میں پاکستانی اور کشمیری باشندوں، میڈیا، ماہرین تعلیم اور انسانی حقوق کے کارکنوں نے شرکت کی۔ اس موقع پر حاضرین کو صدر مملکت اور وزیراعظم پاکستان کے پیغامات پڑھ کر سنائے گئے۔ علاوہ ازیں کشمیریوں کی جدوجہد پر مختلف دستاویزی فلمیں دکھائی گئیں اور سوشل اور مقامی الیکٹرانک میڈیا پر نشر کی گئیں۔ پاکستان کے ہائی کمشنر محمد سلیم نے نہتے کشمیریوں کو نہ ختم ہونے والے مظالم کا نشانہ بنانے والی بھارتی ڈھٹائی کو اجاگر کیا۔
ہائی کمشنر نے اپنے ویڈیو پیغام میں اس بات کا بھی اعادہ کیا کہ انسانی حقوق کی بین الاقوامی تنظیمیں، میڈیا اور اقوام متحدہ کے انسانی حقوق کے میکانزم، مقبوضہ جموں و کشمیر میں بھارت کے غیر قانونی اور غیر انسانی اقدامات کی مذمت میں متفق ہیں۔ انہوں نے اس بات پر زور دیا کہ بھارتی غیر قانونی مقبوضہ جموں و کشمیر دنیا کا سب سے زیادہ فوجیوں کی تعیناتی والا علاقہ ہے۔ انہوں نے عالمی برادری پر زور دیا کہ وہ بھارت کو مقبوضہ جموں و کشمیر میں انسانی حقوق کی بڑے پیمانے پر خلاف ورزیوں کو روکے، یکطرفہ اور غیر قانونی اقدامات کو واپس لے اور اقوام متحدہ کی 13 قراردادوں پر عمل درآمد کرے۔ انہوں نے مزید کہا کہ بین الاقوامی رائے عامہ کو متحرک کرنے کے لیے ٹھوس کوششوں کی ضرورت ہے کیونکہ کشمیر کے لوگوں کو حق خودارادیت د یئے بغیر اس دیرینہ تنازعہ کو حل نہیں کیا جا سکتا
