راولپنڈی(کرائم رپورٹر ) سٹی ٹریفک پولیس نے رمضان المبارک کے دوران انسداد ون ویلنگ کیلئے اینٹی ون ویلنگ سکواڈتشکیل دے دیا، تفصیلات کے مطابق چیف ٹریفک آفیسر بینش فاطمہ کے احکامات پر عمل کرتے ہوئے سٹی ٹریفک پولیس نے رمضان المبارک کے دوران انسداد ون ویلنگ کیلئے اینٹی ون ویلنگ سکواڈ تشکیل دیتے ہوئے 60 سے زائد اہلکاروں کو تعینات کیا۔ چیف ٹریفک آفیسر بینش فاطمہ نے بتایا کہ رمضان المبارک کے دوران ون ویلنگ کی روک تھام کیلئے پانچ سپیشل سکواڈ تشکیل دیتے ہوئے 60 سے زائد اہلکار تعینات کیے گئے ہیں،جن میں 07 ڈی ایس پیز /سرکل آفیسر، 07 سینئر ٹریفک وارڈنز، 49 ٹریفک وارڈنز اور ٹریفک اسٹنٹس شامل ہیں جو کہ سحری کے اوقات چار بجے سے سات بجے تک اور افطاری کے بعد شام سات بجے سے رات ایک بجے تک کام کریں گے،جبکہ اہم شاہراؤں پر خصوصی پکٹس بھی قائم کی گئی ہیں جہاں ون ویلنگ کے مرتکب منچلوں کیخلاف بلا تفریق قانونی کارروائی عمل میں لائی جائے گی، چیف ٹریفک آفیسر راولپنڈی بینش فاطمہ نے مزید بتایا کہ نماز تراویح اور سحری کے اوقات میں مساجد ڈیوٹی کے لیے بھی 10 ڈی ایس پیز / سرکل آفیسرز، 17 سینئر ٹریفک وارڈنز، 62 ٹریفک وارڈنز اور 22 ٹریفک اسٹنٹس سمیت کل 111 افسران و اہلکاران ٹریفک ڈیوٹی سر انجام دیں گے۔ سی ٹی او بینش فاطمہ نے بتایا کہ راولپنڈی ٹریفک پولیس انسانی جانوں کے تحفظ اور انسداد ون ویلنگ کے لیے تمام تر وسائل بروکار لا رہی ہے جبکہ ون ویلنگ کیلئے موٹر سائیکلوں کی آلٹریشن کرنیوالے مکینکس کی بھی خصوصی مانیٹرنگ کی جا رہی ہے،انہوں نے کہاکہ ون ویلنگ کی روک تھام کے حوالے سے خصوصی پکٹس و اہم پوائنٹس پر ضلعی پولیس کی بھر پور معاونت حاصل ہو گی اور خلاف ورزی کے مرتکب عناصر کیخلاف موثر و جامع کارروائی عمل میں لائی جائے گی۔ انھوں نے والدین سے بھی خصوصی اپیل کی کہ ان خاص دنوں میں اپنے بچوں پر خصوصی نظر رکھیں اور کم عمری میں انھیں موٹر سائیکل یا گاڑی دینے سے گریز کریں تا کہ وہ حادثات سے محفوظ رہ سکیں۔
21
