اسلام آباد(کامرس رپورٹر)
صدر کوئٹہ چیمبر آف کامرس اینڈ انڈسٹری حاجی ایوب مریانی نے امریکی صدر ڈونلڈ ٹرمپ کے پاکستان کیساتھ تجارت بڑھانے کے بیان کو خوش آئند قرار دیتے ہوئے کہا کہ امریکہ کے ساتھ تجارت بڑھانے سے پاکستانی برآمدات کو تقویت ملے گی جس سے معیشت کو فائدہ ہوگا۔انہوں نے زور دیا کہ دونوں ممالک کے درمیان تجارتی شراکت داری کو مزید مضبوط بنانے کی ضرورت ہے۔اگر امریکہ اور پاکستان کے درمیان تجارتی تعلقات میں بہتری آتی ہے تو اس سے پاکستان کی معاشی ترقی کو رفتار مل سکتی ہے، خاص طور پر ٹیکسٹائل، زراعت اور انفارمیشن ٹیکنالوجی کے شعبوں کو فائدہ ہوگا۔ صدر ایوب مریانی نے حکومت پاکستان پر زور دیتے ہوئے کہا کہ امریکہ کے ساتھ تجارتی معاہدوں کو بہتر بنانے کے لیے سفارتی کوششیں تیز کریں تاکہ اس موقع سے مکمل فائدہ اٹھایا جا سکے۔ امریکہ پاکستان کا ایک اہم تجارتی شراکت دار ہے اور اگر دونوں ممالک کے درمیان تجارتی رکاوٹیں دور کی جائیں تو پاکستانی مصنوعات کی امریکی منڈی تک رسائی آسان ہو سکتی ہے اس پر عملی اقدامات کی ضرورت ہوگی جس کے لیے دونوں ممالک کے درمیان گہرے تجارتی مذاکرات ہونے چاہئیں۔
31
